Psychology & Neurodiversity

البعض تعيش معه عمر لا تذكر منه لحظه !

والبعض تعيش معه لحظه تذكرها طول العمر

إعادة نشر....مدرسة التحليل النفسي – سيجموند فرويد
: ليه فرويد بدأ المدرسة دي؟
فرويد كان دكتور أعصاب، وكان بيشوف حالات كتير عندها أعراض جسدية (زي شلل، صعوبة في الكلام، نسيان...) من غير أي سبب عضوي.
يعني التحاليل سليمة، لكن الجسم "بيتكلم" بمعنى تاني.

بدأ يفكر:
"طب لو مفيش سبب جسدي... يبقى لازم يكون في سبب نفسي!"

ومن هنا طلع بفكرته الأساسية:
إن الجسم ممكن يعبّر عن مشاعر دفنّاها، حاجات حصلت زمان وأثّرت فينا، بس ما عرفناش نواجهها، فاتركنت في اللاوعي... وبدأت تطلع في شكل أعراض.

: مفهوم "اللاوعي" أو "اللاشعور"

فرويد قال إن الإنسان مش بيتحرك بس بالحاجات اللي واخد باله منها...
فيه جزء كبير مننا مستخبي، زي مخزن كبير جوا عقلنا... اسمه "اللاوعي".

جوا اللاوعي ده:

ذكريات من الطفولة ما قدرناش نتحملها

مشاعر ممنوعة (زي كره للأب أو رغبة في التمرد)

تجارب جنسية أولى

خجل، عار، ذنب، خوف

وكل ده، وإن كنا مش واعيين بيه، بس بيأثر على سلوكنا، قراراتنا، علاقاتنا، وحتى جسمنا.

تركيب النفس البشرية عند فرويد

(نظرية الجهاز النفسي)

فرويد قسم النفس لـ ٣ مكونات:

1. الهو (Id):

الجزء الغريزي، الحيواني، الطفولي جوانا.
عايز المتعة حالًا، من غير ما يفكر في الصح والغلط.
يعني لو "الهو" اتحكم فينا، نبقى أنانيين، نتصرف بعنف، نطلب اللي إحنا عايزينه من غير حساب.

2. الأنا (Ego):

الجزء العاقل، الواعي، اللي بيوازن بين رغبات "الهو" وبين الواقع.
هو اللي بيقول: استنى، متقدرش تاخد اللي مش ليك...
الأنا بيلعب دور "المدير" بين الهو والأنا الأعلى.

3. الأنا الأعلى (Super Ego):

ده الضمير، الأخلاق، صوت المجتمع اللي جوانا.
بيقولك "عيب"، "حرام"، "ما ينفعش".
لو زاد تأثيره، الشخص يبقى مثالي بزيادة، حاسس بالذنب دايمًا، حتى لو معملش حاجة غلط.

: إزاي بتحصل الاضطرابات النفسية؟

فرويد بيقول إن المرض النفسي بيحصل لما يحصل صراع بين أجزاء النفس التلاتة:

مثال:

"الهو" عايز علاقة جنسية حالًا

"الأنا الأعلى" بيقوله حرام وغلط

"الأنا" بيتشدّ رايح جاي، والتوتر بيزيد

الشخص يفضل يكبت مشاعره… ومع الوقت، تطلع في شكل قلق أو اكتئاب أو وسواس

: آليات الدفاع النفسي

عشان الأنا تحمينا من التوتر اللي جاي من الصراع ده، بتستخدم أدوات اسمها "آليات دفاعية".

أشهرها:

الكبت: ندفن الحاجة في اللاوعي كأنها ما حصلتش

الإسقاط: أنسب للناس اللي حواليا مشاعري أنا (أنا بغير، فأقول "كل الناس بتغير مني")

التبرير: أختلق أسباب شكلها منطقي لتصرف غلط

النكوص: أرجع أتصرف كأني طفل (زي لما حد يعيط بطريقة طفولية تحت ضغط)

بس لما الدفاعات دي تزيد، وتبقى الطريقة الوحيدة اللي بنتعامل بيها مع الدنيا، بيحصل خلل.

: العلاج بالتحليل النفسي

التحليل مش بيشتغل على "العَرَض" بس...
لأ، هو بيرجعك للماضي، يشوف الجرح الأصلي، يطلّعه للنور، ويخليك تفهمه وتتجاوزه.

أدوات التحليل:

التداعي الحر: العميل يتكلم من غير ترتيب، وكل كلمة ممكن تكشف حاجة

تحليل الأحلام: لأن فرويد شايف إن الحلم هو "طريق الملك" للاوعي

النقل: العميل يحس بمشاعر ناحية المعالج (حب – كره – احتياج)، وهي أصلاً مشاعر قديمة من طفولته، وده فرصة نشتغل على جذورها

التحليل الزمني الطويل: لأن اللاوعي مش بيتكلم بسهولة، وبيحتاج وقت ومكان آمن

: التحليل مش للجميع

المدرسة دي عميقة جدًا، ومناسبة للناس اللي:

عندهم وعي وقدرة على التأمل في نفسهم

عايزين يفهموا أصل المشكلة مش مجرد يخلّصوا من العرض

مش مستعجلين، وعندهم وقت ومساحة للعلاج الممتد

لكنها مش دايمًا مناسبة للناس اللي في حالة طارئة أو مش قادرين يتعاملوا مع الجروح القديمة.

🧠 أمثلة لأمراض نفسية من وجهة نظر التحليل النفسي

1. القلق (Anxiety)

القلق عند فرويد مش مجرد شعور بالتوتر...
ده ناتج عن صراع داخلي بين جزء فيّ عايز حاجة (الهو) وجزء تاني رافضها (الأنا الأعلى).
والأنا بيحاول يوازن... بس لما التوتر يعلى ومفيش مفر، بيبدأ يظهر القلق.

مثال:

واحدة بتجيلها نوبات قلق كل ما حد يقرب منها في علاقة.
اللاوعي جواها شايل خوف قديم من التعلّق أو الهجران، فبتخاف ترتبط، وده بيطلع في صورة قلق.

2. الوسواس القهري (OCD)

فرويد كان شايف إن الوسواس هو طريقة دفاع نفسي.
الأنا مش قادر يتعامل مع رغبات لاواعية (غالبًا جنسية أو عدوانية)،
فبيستخدم طقوس متكررة (زي الغسيل أو العدّ أو التفكير المتكرر) علشان يفرّغ التوتر اللي جواه.

مثال:

راجل بيغسل إيده ١٠٠ مرة في اليوم لأنه حاسس إنه "نجس".
لكن جوا اللاوعي، ممكن يكون عنده إحساس بالذنب من رغبات جنسية "محرّمة" حسب ضميره، فبيحاول "ينضف نفسه".

3. الهستيريا (التحويلية)

اللي هي ظهور أعراض جسدية من غير سبب عضوي، وده كان أساس اكتشاف فرويد للتحليل النفسي.

مثال:

واحدة فجأة مش قادرة تتكلم، أو إيدها مش بتتحرك، وكل التحاليل سليمة.
فرويد بيقول: فيه صدمة نفسية قديمة أو رغبة مرفوضة اتحوّلت (تحويل) لأعراض جسدية علشان تخرج بشكل آمن.

4. الاكتئاب

فرويد فسّر الاكتئاب على إنه غضب مقلوب على النفس.
يعني الشخص بيكون عنده غضب أو فقد أو خيبة أمل، لكنه بدل ما يطلّع الغضب ده على السبب الحقيقي، بيرجّعه على نفسه.

مثال:

حد ماتلهوش أبوه وهو صغير، كبر وهو شايل جواه غضب ومش فاهم ليه.
ولأنه شايف إن الغضب على الأب "عيب"، بيكبت مشاعره... وتتحوّل لجلد ذات واكتئاب.

5. اضطرابات الشخصية (زي الشخصية الحدية أو النرجسية)

التحليل بيشوف إن الشخصية فيها "تشوهات في بنية الأنا"، ودي بتبدأ من الطفولة المبكرة.

مثال:

الشخص النرجسي شايف نفسه دايمًا عظيم، بس الحقيقة إن عنده ضعف شديد في الأنا، فبيعوّض ده بصورة مثالية عن نفسه.
الشخص الحدّي مش قادر يثبّت صورته عن نفسه أو عن الناس، وده سببه اضطراب في العلاقة بالأم أو الأب في الطفولة، وتثبيت في مراحل مبكرة.

6. الفوبيا (الرهاب)

فرويد قال إن الفوبيا مش بس خوف من شيء، ده رمز لحاجة أعمق.

مثال:

حد عنده فوبيا من الكلاب، لكن في التحليل نكتشف إن الخوف الحقيقي من السلطة أو العنف اللي شافه في الطفولة، والكلب بقى رمز ليه.

التحليل النفسي مش بيشوف الأعراض زي ما هي،
هو دايمًا بيسأل:

"إيه اللي وراها؟"

"إيه المكبوت؟"

"إيه المشاعر اللي اتحبست؟"

"فين الجرح اللي ما اتعالجش من الطفولة؟"

كل عرض عند فرويد هو مفتاح لباب مقفول جواك.

مدرسة التحليل النفسي بتقولك:
"مشكلتك مش في اللي بيحصل دلوقتي، مشكلتك في اللي حصل زمان ولسه مأثر عليك... من غير ما تحس."

ولو فهمت نفسك على مستوى أعمق، وواجهت اللي مستخبي جواك، ساعتها بس هتبدأ تتعافى بجد.
#طارق_أبوسليم
#أخصائي_الصحة_النفسية_والإرشاد_الأسري

يموت الشجر عطشا بجانب البئر..
لكنه لا ينحني ليطلب الماء🥀

فيه ناس مصدقة بجد إن تحرير الصدمات -مع تحفظي على اللفظ- ممكن يتم من خلال جلسات زي اللي في الصورة دي!!

جلسات بتدوس فيها خشبة مليانة مسامير والعياط والصريخ اللي هيطلع منك وقتها مش هيبقى من ألم المسامير .. توء توء!
هيبقى من تحرير الصدمات!

فيه ناس مصدقة بجد إن دي طريقة من طرق العلاج وبيسعوا ليه..
وحقيقي الناس دي صعبانة عليا بجد، ناقصهم وعي وده مخلي شوية نصابين يضحكوا عليهم ويتاجروا بمرضهم..

دي مش طريقة علمية أولاً.
ثانيًا مفيش حاجة اسمها (تحرير الصدمات) لأن الصدمة مش طاقة محبوسة، دي خبرة نفسية بتتعالج مش بتتفك.
لكن فيه حاجة اسمها علاج الصدمات والتخفيف من حدة تأثيرها.

حقيقي الصدمات شيء حساس جدًا بنتعامل معاه بحرص شديد ومش أي معالج يقدر يعمل ده.

متخلوش حد يضحك عليكم.

‏«لا أظن أنك تجهل الفرق الهائل بين من يستمع إليك وكأنه على سفر، وبين من يصغي لك وقد أوقف العالم كله من حوله»

لزم يكون في حل للشخص النرجسي بجد متعب جدااااا

https://chat.whatsapp.com/K82OT95zsNS3M045PWOqwT